ମ୍ୟାଚ୍‌ ଫିକ୍ସିଂ ଓ ଅର୍ଥ କାରବାରରେ ଧରାପଡିଲେ ଆଜୀବନ ବାସନ୍ଦ: ବିଡବ୍ଲ୍ୟୁଏଫ୍‌

ନୂଆଦିଲ୍ଲୀ: ବ୍ୟାଡ୍‌ମିଣ୍ଟନରେ ମ୍ୟାଚ୍‌ ଫିକ୍ସିଂ, ଜୁଆ କିମ୍ବା ଅର୍ଥ କାରବାରରେ ଧରାପଡିଲେ ଖେଳାଳିଙ୍କୁ ଆଜୀବନ ବାସନ୍ଦ କରାଯିବ। ସମ୍ପୃକ୍ତ ଖେଳାଳିଙ୍କୁ ଜେଲ ଦଣ୍ଡ ମଧ୍ୟ ଭୋଗିବାକୁ ପଡିପାରେ। ଗୁରୁବାର ଏହିପରି କଢ଼ା ଅଭାମୁଖ୍ୟ ଗ୍ରହଣ କରିଛି ବିଶ୍ୱ ବ୍ୟାଟ୍‌ମିଣ୍ଟନ୍‌ ଫେଡେରେସନ(ବିଡବ୍ଲ୍ୟୁଏଫ୍‌)। ବ୍ୟାଡ୍‌ମିଣ୍ଟନକୁ  ଦୁର୍ନୀତି ମୁକ୍ତ କରିବାକୁ ଏହିପରି ଆଭିମୁଖ୍ୟ ଗ୍ରହଣ କରାଯାଇଥିବା ସଂଘ ପକ୍ଷରୁ କୁହାଯାଇଛି।

ଏ ନେଇ ବିଡବ୍ଲ୍ୟୁଏଫ୍‌ର ସଧାରଣ ସମ୍ପାଦକ ଥୋମାସ୍‌ ଲୁଣ୍ଡ କହିଛନ୍ତି, “ବ୍ୟାଟ୍‌ମିଣ୍ଟନ୍‌ ଏକ ସ୍ୱଚ୍ଛ ଖେଳ, ଏଥିରେ ଦୁର୍ନୀତିର ସ୍ଥାନ ନାହିଁ। ଏହି ନିୟମ ସମସ୍ତଙ୍କ ପାଇଁ ଲାଗୁ ହେବ। ଏହି ଖେଳ ସହିତ ଜଡିତ ସମସ୍ତ କର୍ମକର୍ତ୍ତାଙ୍କୁ ଏଥିରେ ଅର୍ନ୍ତଭୁକ୍ତ କରାଯିବ। ଯଦି କୌଣସି ବ୍ୟକ୍ତି କିମ୍ବା ଖେଳାଳି କୌଣସି ଅଜଣା ବ୍ୟକ୍ତିଙ୍କୁ ଭେଟନ୍ତି, ତାଙ୍କ ସହ ମୋବାଇଲ୍‌ ଫୋନ୍‌, ଲାପଟପ୍‌ ଓ ଟେଲିଫୋନ୍‌ରେ କଥାବର୍ତ୍ତା ହୁଅନ୍ତି ତେବେ ସମ୍ପୃକ୍ତ ବ୍ୟକ୍ତି ଓ ଖେଳାଳିମାନେ ବିଡବ୍ଲ୍ୟୁଏଫ୍‌ର ସ୍କାନରରେ ରହିବେ।”