ନୂଆଦିଲ୍ଲୀ: ଦିଲ୍ଲୀ ଆଣ୍ଡ ଜିଲ୍ଲା କ୍ରିକେଟ୍ ଆସୋସିଏସନ୍ (ଡିଡିସିଏ)ର ସାଧାରଣ ସମ୍ପାଦକ ବିନୋଦ ତିହାରା ଦୀର୍ଘ ଦିନ ଧରି କେଉଁଠି ଥିଲେ, ତାହା କାହାକୁ ଜଣା ନଥିଲା। କିନ୍ତୁ ଡିଡିସିଏ ଅଧିକାରୀଙ୍କ କହିବା ଅନୁଯାୟୀ, ବିନୋଦଙ୍କ ଭିତରେ କରୋନା ଲକ୍ଷଣ ଥିବାରୁ ସେ ଆଇସୋଲେସନରେ ଥିଲେ। କିନ୍ତୁ ଯେଉଁ ସତ୍ୟତା ସାମ୍ନାକୁ ଆସିଛି, ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ସତ କଥା ହେଉଛି ବିନୋଦ କୌଣସି ଆଇସୋଲେସନରେ ନଥିଲେ, ବରଂ ସେ ଜିଏସଟି ନିୟମ ଉଲ୍ଲଙ୍ଘନ କାରଣରୁ ମାସେ ହେବ ମୀରଟ୍ ଜେଲରେ ଅଛନ୍ତି। ଏହି କାରଣରୁ ତାଙ୍କ ସହ କେହି ଯୋଗାଯୋଗ କରିପାରୁନଥିଲେ।
ବୁଧବାର ମୀରଟର ଏସଏସପି ଅଜୟ ସାହନୀ କହିଛନ୍ତି, ଦିଲ୍ଲୀର ବାସିନ୍ଦା ବିନୋଦ ତିହାରାଙ୍କ ନାମକ ଜଣେ ବ୍ୟକ୍ତିଙ୍କୁ ଜିଏସଟି ନିୟମ ଉଲ୍ଲଙ୍ଘନ ଅଭିଯୋଗରେ ମାର୍ଚ୍ଚ ୧୭ ତାରିଖରୁ ରାଜସ୍ବ ଗୁଇନ୍ଦା ନିର୍ଦ୍ଦେଶାଳୟ (ଡିଆରଆଇ)ର ନୋଏଡା ଶାଖା ପକ୍ଷରୁ ଗିରଫ କରାଯାଇଥିଲା ଏବଂ ସେ ବର୍ତ୍ତମାନ ମୀରଟ୍ ଜେଲରେ ଅଛନ୍ତି। ତେବେ ତାଙ୍କ ଉପରେ ଯେଉଁ ଉଲ୍ଲଙ୍ଘନର ଅଭିଯୋଗ ଲାଗିଛି, ଯାହା କେଉଁ ଆଧାରରେ ଥିଲା, ଏହାକୁ ନେଇ କିଛି ବି ସ୍ପଷ୍ଟ ସୂଚନା ମିଳିନାହିଁ। ତିହାରା ବିସିସିଆଇରେ ଦିଲ୍ଲୀ କ୍ରିକେଟର ପ୍ରତିନିଧି ଅଛନ୍ତି ଏବଂ ରାଜ୍ୟର କ୍ରିକେଟ୍ ସଂଘର ଜଣେ ପ୍ରଭାବୀ ଅଧିକାରୀ ମଧ୍ୟ ଅଛନ୍ତି। ମାର୍ଚ୍ଚ ମାସ ଅଧାରୁ ତାଙ୍କ ସମ୍ବନ୍ଧରେ କୌଣସି ସୂଚନା କାହା ପାଖରେ ନଥିଲା, ଯେଉଁକାରଣରୁ ଡିଡିସିଏର ଅଧିକାରୀ ଭୟଭୀତ ହୋଇପଡ଼ିଥିଲେ।
ଡିଡିସିଏର ଜଣେ ବରିଷ୍ଠ ଅଧିକାରୀ କହିଛନ୍ତି, ବିନୋଦଙ୍କ ସହ ଦୀର୍ଘ ଦିନ ଧରି କୌଣସି ଯୋଗାଯୋଗ ନହେବାରୁ ଆମେ ଭାବିଲୁ ଯେ ସେ କରୋନା ପଜିଟିଭ୍ ଆସିଛନ୍ତି। କିଛି ସେମାନଙ୍କର ପରିବାର ସଦସ୍ୟଙ୍କୁ ଯୋଗାଯୋଗ କରିଥିଲେ ଏବଂ ସେମାନେ କହିଲେ ଯେ ବିନୋଦ ବର୍ତ୍ତମାନ ଅଲଗା ରହୁଛନ୍ତି। ତେଣୁ ଆମେ ଭାବିଲୁ ଯେ ସେ ଆଇସୋଲେସନରେ ଅଛନ୍ତି। ତାଙ୍କ ଫୋନ୍ ମଧ୍ୟ ମାସେ ଧରି ବନ୍ଦ ରହିଛି।
ଅଧିକାରୀ ଜଣକ ଆହୁରି କହିଛନ୍ତି, ଆମେ ଚିନ୍ତିତ ହୋଇପଡ଼ିଥିଲୁ ଯେ ମାର୍ଚ୍ଚ ୧୫ ତାରିଖ ପର୍ଯ୍ୟନ୍ତ ଆମେ ସମସ୍ତେ ତିହାରାଙ୍କ ସହ ଅଲଗା ଅଲଗା ସ୍ଥାନରେ ସାକ୍ଷାତ କରିଥିଲୁ। ଆମେ ଭାବିଲୁ ତାଙ୍କ ଭିତରେ କରୋନା ଭୂତାଣୁର ଲକ୍ଷଣ ଅଛି। କିନ୍ତୁ ଆଜି ଜଣାପଡ଼ିଲା ଯେ ସେ ଜେଲରେ ଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
