ପ୍ରଥମ ମ୍ୟାଚ୍‌ରେ ବାଜି ମାରିଲେ ସିନ୍ଧୁ

ମୁମ୍ବାଇ: ପ୍ରିମିୟର ବ୍ୟାଡମିଣ୍ଟନ୍ ଲିଗ୍ ସିଜିନ୍-୪ ଶନିବାର ଠାରୁ ଆରମ୍ଭ ହୋଇଛି। ଗତକାଲି ଏକ ରୋମାଞ୍ଚକର ମ୍ୟାଚ୍ ଦେଖିବାକୁ ମିଳିଥିଲା। ଏହି ମୁକାବିଲାରେ ବିଶ୍ୱର ଦୁଇ ଜଣ ଜଣାଶୁଣା ଖେଳାଳି ମୁହାଁମୁହିଁ ହୋଇଥିଲେ। ସେମାନେ ହେଲେ ଭାରତର ପି.ଭି ସିନ୍ଧୁ ଓ ସ୍ପେନ୍‌ର ଅଲିମ୍ପିକ୍ସ ସ୍ୱର୍ଣ୍ଣ ପଦକ ବିଜେତା କ୍ୟାରୋଲିନା ମାରିନ୍।

କିଛି ଦିନ ତଳେ ୱାର୍ଲ୍ଡ ଟୁର୍‌ ଟାଇଟଲ୍‌ ହାସଲ କରିଥିବା ସିନ୍ଧୁ ଏହି ମ୍ୟାଚ୍‌ରେ ୧୧-୧୫, ୧୫-୮ ଓ ୧୫-୧୩ରେ କ୍ୟାରୋଲିନାଙ୍କୁ ପରାସ୍ତ କରିଥିଲେ।

ପ୍ରିମିୟର ବ୍ୟାଡମିଣ୍ଟନ୍ ଲିଗ୍ ସିଜିନ୍-୪ରେ ପି.ଭି ସିନ୍ଧୁ ହାଇଦ୍ରାବାଦ ହଣ୍ଟର୍ସ ପକ୍ଷରୁ ଖେଳୁଥିବା ବେଳେ କ୍ୟାରୋଲିନା ପୁନେ-୭ ଏସେସ୍‌ ପକ୍ଷରୁ ଖେଳୁଛନ୍ତି।

ପ୍ରିମିୟର ବ୍ୟାଡମିଣ୍ଟନ୍ ଲିଗ୍‌ର ଗତ ସିଜିନ୍‌ରେ କ୍ୟାରୋଲିନା ଗୋଟିଏ ବି ମ୍ୟାଚ୍ ହାରି ନଥିଲେ।

ଗତକାଲି ମ୍ୟାଚ୍‌କୁ ମିଶାଇ ଏଯାବତ୍ ସିନ୍ଧୁ ଓ କ୍ୟାରୋଲିନା ମୋଟ ୧୪ ଥର ବ୍ୟାଡ୍‌ମିଣ୍ଟନ୍ କୋର୍ଟରେ ମୁହାଁମୁହିଁ ହୋଇଛନ୍ତି। ଏଥିରୁ ସିନ୍ଧୁ ୭ଟିରେ ଜିତିଥିବା ବେଳେ ୭ଟିରେ ହାରିଛନ୍ତି। ଅର୍ଥାତ୍ ଉଭୟ ସମାନ ସ୍ଥିତିରେ ଅଛନ୍ତି।

ଗତ ଅଗଷ୍ଟ ମାସରେ ବିଶ୍ୱ ଚାମ୍ପିୟନସିପ୍‌ରେ ସିନ୍ଧୁ ଓ କ୍ୟାରୋଲିନାଙ୍କ ମଧ୍ୟରେ ଲଢ଼େଇ ହୋଇଥିଲା। ଏଥିରେ କ୍ୟାରୋଲିନା ବାଜି ମାରିଥିଲେ।

ଗତକାଲି ଠାରୁ ଆରମ୍ଭ ହୋଇଥିବା ପ୍ରିମିୟର ବ୍ୟାଡମିଣ୍ଟନ୍ ଲିଗ୍ ସିଜିନ୍-୪ ଜାନୁଆରୀ ୧୩ ତାରିଖରେ ସରିବ। ଏଥିରେ ୧୭ଟି ଦେଶର ମୋଟ ୯୦ ଜଣ ଖେଳାଳି ଭାଗ ନେଇଛନ୍ତି।