ନୂଆଦିଲ୍ଲୀ: ଅନ୍ତର୍ଜାତୀୟ ଟି-୨୦ କ୍ରିକେଟରେ ୟୁରୋପର ଏକ ଛୋଟିଆ ଦେଶ ରୋମାନିଆ ଏଭଳି ଏକ କାରନାମା କରିଛି, ଯାହା ଭାରତ, ଅଷ୍ଟ୍ରେଲିଆ ଓ ଇଂଲଣ୍ଡ ଭଳି ଶକ୍ତିଶାଳୀ ଦେଶ କରିପାରିନାହାନ୍ତି। ରୋମାନିଆ ଗୁରୁବାର ଖେଳାଯାଇଥିବା ମ୍ୟାଚରେ ତୁର୍କୀକୁ ୧୭୩ ରନରେ ହରାଇ ଅନ୍ତର୍ଜାତୀୟ ଟି-୨୦ କ୍ରିକେଟରେ ସବୁଠାରୁ ବଡ଼ ବିଜୟର ରେକର୍ଡ ନିଜ ନାଁରେ କରିଛି। ରୋମାନିଆ ଶ୍ରୀଲଙ୍କା ନାଁରେ ଥିବା ୧୨ ବର୍ଷର ପୁରୁଣା ରେକର୍ଡକୁ ଭାଙ୍ଗିଛି।
ଏହି ମ୍ୟାଚରେ ରୋମାନିଆ ପ୍ରଥମେ ବ୍ୟାଟିଂ କରି ଶିବକୁମାର ପେରିୟାଲୱାରଙ୍କ ଶତକ ବଳରେ ନିର୍ଦ୍ଧାରିତ ୨୦ ଓଭରରେ ୬ ୱିକେଟ୍ ହରାଇ ୨୨୬ ରନ୍ କରିଥିଲା। ଜବାବରେ ରୋମାନିଆ ବୋଲରମାନେ ତୁର୍କୀ ଟିମକୁ ମାତ୍ର ୫୩ ରନରେ ଅଲଆଉଟ୍ କରି ମ୍ୟାଚକୁ ଏକତରଫା ଭାବେ ଜିତି ନେଇଥିଲା। ରୋମାନିଆ ପୂର୍ବରୁ ଟି-୨୦ କ୍ରିକେଟରେ ସବୁଠାରୁ ବଡ଼ ବିଜୟର ରେକର୍ଡ ଶ୍ରୀଲଙ୍କା ନାଁରେ ଥିଲା।
୨୦୦୭ରେ ଆୟୋଜିତ ଟି-୨୦ ବିଶ୍ୱକପରେ ଶ୍ରୀଲଙ୍କା ୧୭୨ ରନରେ କେନିୟାକୁ ପରାସ୍ତ କରିଥିଲା। ରୋମାନିଆର ବ୍ୟାଟ୍ସମ୍ୟାନ୍ ପେରିୟାଲୱାର୍ ମାତ୍ର ୪୦ ବଲରେ ୧୦୫ ରନର ଅପରାଜିତ ଇନିଂସ୍ ଖେଳିଥିଲେ। ପଞ୍ଚମ ସ୍ଥାନରେ ବ୍ୟାଟିଂ କରିବାକୁ ଆସିଥିବା ଏହି ବ୍ୟାଟ୍ସମ୍ୟାନ୍ ନିଜ ଇନିଂସରେ ୧୨ ଚୌକା ଓ ୬ ଛକା ମାରିଛନ୍ତି।
ପେରିୟାଲୱାର୍ ପେସାରେ ଜଣେ ସଫ୍ଟୱେର୍ ଇଞ୍ଜିନିୟର୍। ଏହାସହ ସେ ରୋମାନିଆ ପକ୍ଷରୁ ଟି-୨୦ କ୍ରିକେଟରେ ଶତକ ମାରିବାରେ ପ୍ରଥମ ବ୍ୟାଟ୍ସମ୍ୟାନ୍ ହୋଇଛନ୍ତି। ତାଙ୍କ ଜନ୍ମ ତାମିଲନାଡୁର ଶିବକାଶୀରେ ହୋଇଥିଲା। ପେରିୟାଲୱାର୍ ଭାରତରେ ମଧ୍ୟ ଅଣ୍ଡର୍-୧୫ ଓ ଅଣ୍ଡର-୨୨ ପର୍ଯ୍ୟନ୍ତ କ୍ରିକେଟ୍ ଖେଳିଛନ୍ତି। କିନ୍ତୁ ବି-ଟେକ୍ ଶେଷ କରିବା ପରେ ସେ ରୋମାନିଆ ଚାଲିଯାଇଥିଲେ। ରୋମାନିଆରେ ସେ କ୍ଲବରେ ଯୋଗ ଦେଇଥିଲେ ଏବଂ କ୍ରିକେଟ୍ ଖେଳିବା ଆରମ୍ଭ କରିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
