ନାବାଳିକା ବଳାତ୍କାରୀଙ୍କୁ ଖୋଜୁଛି କ୍ରାଇମବ୍ରାଞ୍ଚ: ବିଏସ୍ଏଫ୍ ଓ କୋବ୍ରା ବାହିନୀ କ୍ୟାମ୍ପରେ ତନାଘନା

କୋରାପୁଟ(ଓଡ଼ିଶା ରିପୋର୍ଟର): କୋରାପୁଟ ଜିଲ୍ଲା କୁନ୍ଦୁଲି ଅଞ୍ଚଳରେ ନବମ ଶ୍ରେଣୀ ଛାତ୍ରୀଙ୍କୁ ଗଣବଳାତ୍କାର କରିଥିବା ଅଭିଯୁକ୍ତ କିଏ ? ତାହା ଏବେ ବି ରହସ୍ୟ ଘେରରେ ରହିଛି। ତେବେ ସୁରକ୍ଷାକର୍ମୀଙ୍କ ଉପରେ ସିଧାସଳଖ ଅଭିଯୋଗ ଆସିଥିବାରୁ କୋରାପୁଟ ଜିଲ୍ଲାର ବିଭିନ୍ନ କ୍ୟାମ୍ପକୁ ଯାଇ ତନାଘନା ଚଳାଇଛି କ୍ରାଇମବ୍ରାଞ୍ଚ ଓ ପୋଲିସ ଟିମ୍। ଏପରିକି ଟିମ୍‌ ରାଲେଗେଡ଼ା ବିଏସ୍ଏଫ୍ କ୍ୟାମ୍ପ ଓ ସୁନାବେଡ଼ା ସ୍ଥିତ କୋବ୍ରା ବାହିନୀ କ୍ୟାମ୍ପକୁ ଯାଇ ପଚରାଉଚରା କରିଛି। ପରେ ସେଠାକାର ଯବାନଙ୍କ ଉପସ୍ଥିତି ସଂପର୍କିତ ରେଜିଷ୍ଟର ଯାଞ୍ଚ କରିଥିଲା କ୍ରାଇମବ୍ରାଞ୍ଚ। ସେହିପରି ପଟାଙ୍ଗି ବିଏସଫ୍ କ୍ୟାମ୍ପରେ ମଧ୍ୟ ତନାଘନା ହୋଇଛି। ଏପରିକି ନିଜେ ଦକ୍ଷିଣ ପଶ୍ଚିମାଞ୍ଚଳ ଡିଆଇଜି ଓ କୋରାପୁଟ ଏସ୍‌ପି ମଧ୍ୟ ଗଣଦୁଷ୍କର୍ମ ସ୍ଥାନ ପରିଦର୍ଶନ କରିଛନ୍ତି। ଘଟଣାସ୍ଥଳରୁ ନମୂନା ସଂଗ୍ରହ କରିଛି ଫୋରେନ୍ସିକ ଟିମ୍।

 

 

ପୋଲିସ ଡିଜି ରାଜେନ୍ଦ୍ର ପ୍ରସାଦ ଶର୍ମା କହିଛନ୍ତି-“ତଦନ୍ତ ଠିକ୍‌ ଦିଗରେ ଚାଲିଛି। କୁନ୍ଦୁଲି ଆଖପାଖ ଅଞ୍ଚଳରେ ଥିବା ସୁରକ୍ଷା କର୍ମୀଙ୍କ କ୍ୟାମ୍ପରେ ତଲାସି ଚାଲିଛି।”

କୋରାପୁଟ ଏସ୍‌ପି କେ.ଭି.ସିଂ କହିଛନ୍ତି-“ଏହି ଘଟଣାର ତଦନ୍ତ ପାଇଁ ଗଠନ ହୋଇଥିବା ୪ଟି ଟିମ୍‌ ବିଭିନ୍ନ ସ୍ଥାନରେ ଚଢ଼ାଉ କରୁଛନ୍ତି। ଏପରିକି କ୍ୟାମ୍ପରେ ଥିବା ଉପସ୍ଥାନ ଯାଞ୍ଚ କରାଯାଉଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।”

ଗଣଦୁଷ୍କର୍ମ ଘଟଣାକୁ ନେଇ ଜୋର ରାଜନୀତି

କୁନ୍ଦୁଲି ଗଣଦୁଷ୍କର୍ମ ଘଟଣାକୁ ନେଇ ଜୋର ଧରିଛି ରାଜନୀତି। ପୂର୍ବତନ ସାଂସଦ ପ୍ରଦୀପ  ମାଝୀ ଓ ବିଧାୟକ କୃଷ୍ଣଚନ୍ଦ୍ର ଶଗରିଆଙ୍କ ନେତୃତ୍ୱରେ କଂଗ୍ରେସ ଫ୍ୟାକ୍ଟ ଫାଇଣ୍ଡିଂ ଟିମ୍ ଆଜି ପୀଡ଼ିତାଙ୍କ ଗାଁକୁ  ଯାଇ ପଚରାଉଚରା କରି ଫେରିଛି। ଦୋଷୀଙ୍କୁ ଶୀଘ୍ର ଧରାନଗଲେ ଆନ୍ଦୋଳନ ଧମକ ଦେଇଛି ଦଳ। ସେହିପରି ବିଜେପି ମହିଳା ମୋର୍ଚ୍ଚାର ଏକ ଟିମ୍ ମଧ୍ୟ ଚିକିତ୍ସାଧୀନ ପୀଡ଼ିତାଙ୍କୁ ଭେଟିଛନ୍ତି। ଏପରିକି ନାବାଳିକାଙ୍କ ସ୍ୱାସ୍ଥ୍ୟ ସମ୍ପର୍କରେ ମେଡିକାଲ  କର୍ତ୍ତୃପକ୍ଷଙ୍କୁ ପଚରାଉଚରା କରିଛନ୍ତି। ବିଜେଡି ଯୁବମୋର୍ଚ୍ଚା ଟିମ୍ ମଧ୍ୟ ମେଡିକାଲ ଯାଇ ପୀଡ଼ିତାଙ୍କ  ଅବସ୍ଥା ବୁଝିଛନ୍ତି। ତେବେ ସମସ୍ତେ ପୀଡ଼ିତାଙ୍କୁ ନ୍ୟାୟ ଦାବି କରିଛନ୍ତି।

କିଏ କ’ଣ କହୁଛନ୍ତି

କଂଗ୍ରେସ ନେତା ପ୍ରଦୀପ ମାଝୀ କହିଛନ୍ତି-“ନାବାଳିକାକୁ ଧର୍ଷଣ କରିଥିବା ୪ ଜଣଙ୍କୁ ରାଜ୍ୟ ସରକାର ଜାଣିଛନ୍ତି। ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ନହେଲେ ଏହି ଅଞ୍ଚଳରେ ଏକ ବଡ଼ଧରଣର ଗଣ ଆନ୍ଦୋଳନ କରାଯିବ।”

ରାଜ୍ୟ ବିଜେପି ମହିଳା ମୋର୍ଚ୍ଚା ସମ୍ପାଦିକା ବବିତା ପାତ୍ର କହିଛନ୍ତି-“ବଳାତ୍କାର ନେଇ ପୀଡ଼ିତାଙ୍କ ଭାଇମାନେ ଥାନାରେ ଅଭିଯୋଗ କରିଥିଲେ। ସେତେବେଳେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ ବଳାତ୍କାରୀମାନେ ଧରାପଡ଼ିଥାନ୍ତେ।”

ଯୁବ ବିଜେଡି ସାଧାରଣ ସମ୍ପାଦକ ଧର୍ମେନ୍ଦ୍ର ଅଧିକାରୀ କହିଛନ୍ତି-“ଯେଉଁମାନେ ଏହି ଅପକର୍ମ କରିଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ଏହାଛଡ଼ା ପୀଡ଼ିତାଙ୍କୁ ସରକାରୀ ସାହାଯ୍ୟ ମିଳୁ।”