ଦୁଇ ଥର ନେଗେଟିଭ ପରେ କରୋନା ପଜିଟିଭ ହୋଇଥିବା ପୁଲିସ ଇନସପେକ୍ଟରଙ୍କ ମୃତ୍ୟୁ

ଲକ୍ଷ୍ନୌ: ୮ ଦିନ ମଧ୍ୟରେ ଦୁଇ ଥର କରୋନା ଟେଷ୍ଟ ରିପୋର୍ଟ ନେଗେଟିଭ ଆସିଥିଲା। ତେବେ ତୃତୀୟ ଥର ଟେଷ୍ଟ ବେଳେ କରୋନା ରିପୋର୍ଟ ପଜିଟିଭ ଆସିବାରୁ କିଛି ଦିନ ତଳେ ହସ୍ପିଟାଲ ଭର୍ତ୍ତି ହୋଇଥିବା ଉତ୍ତର ପ୍ରଦେଶର ଜଣେ ପୁଲିସ୍‌ ଇନସପେକ୍ଟର ବୁଧବାର ପ୍ରାଣ ହରାଇଛନ୍ତି।

୪୭ ବର୍ଷୀୟ ଇନସପେକ୍ଟର ଇନ୍ଦରଜୀତ ସିଂହ ଭୌଦରିୟା ଉତ୍ତର ପ୍ରଦେଶରେ ଉନ୍ନାଓରେ ରହୁଥିଲେ। ସେ ୧୯୮୯ରେ ପ୍ରଥମେ କନଷ୍ଟେବଲ ଭାବେ ପୁଲିସ୍‌ ଚାକିରି ଆରମ୍ଭ କରିଥିଲେ। ୨୦୧୩ରେ ସେ ସବ ଇନସପେକ୍ଟର ଓ ମାତ୍ର ମାସକ ତଳେ ଇନସପେକ୍ଟର ରାଙ୍କକୁ ପଦୋନ୍ନତି ପାଇଥିଲେ।

ଇନ୍ଦରଜୀତ ମୀରଟରେ ଥିବା ପୁଲିସ୍‌ ଟ୍ରେନିଂ ସ୍କୁଲରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇ ଜୁଲାଇ ୨୩ରେ ଶାହଜାହନପୁର ଫେରିଥିଲେ। ତେବେ ତାଙ୍କର କଫ ଓ ଛିଙ୍କ ହେବାରୁ ସେ କରୋନା ଟେଷ୍ଟ କରିଥିଲେ। ଜୁଲାଇ ୨୩ରୁ ୩୧ ମଧ୍ୟରେ ସେ ଦୁଇ ଥର ଟେଷ୍ଟ କରିଥିଲେ ହେଁ ତାଙ୍କ ରିପୋର୍ଟ ନେଗେଟିଭ ଆସିଥିଲା।

ପ୍ରଥମ ଟେଷ୍ଟ ଆଣ୍ଟିଜେନ କିଟ ଓ ଦ୍ୱିତୀୟ ଟେଷ୍ଟ ଆରଟି ପିସିଆର ଜରିଆରେ କରାଯାଇଥିଲା। ରିପୋର୍ଟ ନେଗେଟିଭ ଆସିବା ସତ୍ତ୍ୱେ ତାଙ୍କ ସ୍ୱାସ୍ଥ୍ୟାବସ୍ଥା ଦିନକୁ ଦିନ ବିଗିଡ଼ିବା ଆରମ୍ଭ ହୋଇଥିଲା। ଶେଷରେ ତାଙ୍କୁ ଲକ୍ଷ୍ନୌ ହସ୍ପିଟାଲରେ ଭର୍ତ୍ତି କରାଯାଇଥିଲା। ଏଠାରେ ତାଙ୍କ କରୋନା ଟେଷ୍ଟ ରିପୋର୍ଟ ପଜିଟିଭ ଆସିଥିଲା। ହେଲେ ଅଗଷ୍ଟ ୫ରେ ତାଙ୍କର ମୃତ୍ୟୁ ଘଟିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।