ନୂଆଦିଲ୍ଲୀ: ଭାରତ ପକ୍ଷରୁ ଏସିଆନ୍ ଚାମ୍ପିୟନଶିପରେ ବ୍ରୋଞ୍ଜ ପଦକ ଜିତିଥିବା ପୂର୍ବତନ ଆଥଲେଟ୍ ଇକବାଲ୍ ସିଂହ ତାଙ୍କ ପତ୍ନୀ ଓ ମା'ଙ୍କୁ ହତ୍ୟା କରିଛନ୍ତି। ଏଥିପାଇଁ ଶ୍ରୀ ସିଂହଙ୍କୁ ଆମେରିକାରେ ଗିରଫ କରାଯାଇଛି। 'ଦି ଫିଲାଡେଲଫିଆ' ଇନକ୍ୱାୟରର' ରିପୋର୍ଟ ମୁତାବକ ପେନିସେଲଭାନିଆର ଡେଲାୱେର କାଉଣ୍ଟିରେ ରହୁଥିବା ୬୨ ବର୍ଷୀୟ ଇକବାଲ୍ ରବିବାର ସକାଳେ ପୁଲିସକୁ ଫୋନ୍ କରି ନିଜର ଅପରାଧ ସ୍ୱୀକାର କରିଥିଲେ। ଏହାପରେ ତାଙ୍କୁ ଗିରଫ କରାଯାଇଛି।
ରିପୋର୍ଟରେ କୁହାଯାଇଛି, ଯେତେବେଳେ ପୁଲିସ୍ ନ୍ୟୁଟାଉନ୍ ଟାଉନଶିପରେ ଥିବା ଇକବାଲଙ୍କ ଘରେ ପହଞ୍ଚିଲା ସେତେବେଳେ ସେ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଥିଲେ। କାରଣ ସେ ନିଜ ପତ୍ନୀ ଓ ମା’ଙ୍କୁ ହତ୍ୟା କରିବା ପରେ ନିଜକୁ ନିଜ ମଧ୍ୟ ଧାରୁଆ ଅସ୍ତ୍ରରେ କ୍ଷତି ପହଞ୍ଚାଇଥିଲେ। ଇକବାଲଙ୍କ ଘର ଭିତରେ ତାଙ୍କ ମା’ ଓ ପତ୍ନୀଙ୍କ ମୃତଦେହ ପଡ଼ିଥିବା ପୁଲିସ୍ ଦେଖିବାକୁ ପାଇଥିଲା।
ରବିବାର ଗିରଫ ହୋଇଥିବା ଇକବାଲଙ୍କ ବିରୋଧରେ ସୋମବାର ହତ୍ୟା ଅଭିଯୋଗ ଦାଏର ହୋଇଥିଲା। ଏବେ ଆହତ ଇକବାଲଙ୍କୁ ହସ୍ପିଟାଲରେ ଚିକିତ୍ସା ସେବା ଯୋଗାଇ ଦିଆଯାଉଛି।
ସୂଚନାଯୋଗ୍ୟ, ଇକବାଲ୍ ଜଣେ ଶଟପୁଟ୍ ଆଥଲେଟ୍ ଥିଲେ। ସେ ୧୯୮୩ରେ କୁଏତରେ ଆୟୋଜିତ ଏସିଆନ୍ ଆଥଲେଟିକ୍ସ ଚାମ୍ପିୟନଶିପରେ ଭାରତ ପକ୍ଷରୁ ସେ ବ୍ରୋଞ୍ଜ ପଦକ ଜିତିଥିଲେ। ଏହା ତାଙ୍କ କ୍ୟାରିୟରର ସବୁଠାରୁ ବଡ଼ ସଫଳତା ଥିଲା। ଏହା ପରେ ସେ ଆମେରିକାରେ ରହିବାକୁ ଚାଲିଯାଇଥିଲେ। ଆମେରିକାରେ ସେ ଏକ ଟାକ୍ସି ଡ୍ରାଇଭର୍ ଭାବେ କାମ କରୁଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।