ବେଙ୍ଗାଲୁରୁ: କରୋନାର କରାଳ ଓ ଭୟଙ୍କର ରୂପ ମଧ୍ୟରେ ସମଗ୍ର ଦେଶ ଆଉଟ ପାଉଟ ହେଉଛି। ପ୍ରତିଦିନ ରେକର୍ଡ ସଂଖ୍ୟକ ପଜିଟିଭ ଚିହ୍ନଟ ହେବାରୁ ଲୋକଙ୍କ ମଧ୍ୟରେ ଆତଙ୍କ ଖେଳିଯାଉଛି। ଏସବୁ ଭିତରେ କର୍ଣ୍ଣାଟକାରେ କ୍ଷମତାସୀନ ବିଜେପି ସରକାର କରୋନା ମୁକାବିଲା ନେଇ ହାତ ଟେକି ଦେଇଛି।
ରାଜ୍ୟରେ ସଂକ୍ରମିତଙ୍କ ସଂଖ୍ୟା ହୁହୁ ହୋଇ ବଢ଼ୁଥିବା ବେଳେ ସରକାର ଏବେ ଭଗବାନ ହିଁ ସମସ୍ତଙ୍କୁ ରକ୍ଷା କରିପାରିବେ ବୋଲି କହିଛନ୍ତି। କର୍ଣ୍ଣାକଟା ସ୍ୱାସ୍ଥ୍ୟମନ୍ତ୍ରୀ ବି ସୀରାମୁଲୁ କହିଛନ୍ତି, ମହାମାରୀ କରୋନାର ସ୍ଥିତି ଯାହା ହେଲାଣି, ଏବେ କେବଳ ଭଗବାନ ହିଁ ଆମ ସମସ୍ତଙ୍କୁ ରକ୍ଷା କରିପାରିବେ।
କର୍ଣ୍ଣାଟକା ଏବେ ଗୁଜରାଟକୁ ପଛରେ ପକାଇ କରୋନା ପ୍ରଭାବିତ ତାଲିକାର ୪ନଂରେ ପହଞ୍ଚି ଯାଇଛି। ଦିନକୁ ଦିନ ସଂକ୍ରମଣ କମିବା ପରିବର୍ତ୍ତେ ବଢ଼ିବାରେ ଲାଗିଛି। ଏହାକୁ ମୁକାବିଲା କରିବା ପରିବର୍ତ୍ତେ ସୀରାମୁଲୁ କହିଛନ୍ତି, “ସମଗ୍ର ବିଶ୍ୱରେ କରୋନା ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି। ଆମକୁ ଏଥିପାଇଁ ସତର୍କ ରହିବା ଜରୁରୀ।
ଆପଣ ସରକାର ଦଳର ହୁଅନ୍ତି କି ବିରୋଧୀ ଦଳର ହୁଅନ୍ତୁ। ଆପଣ ଗରିବ ହୁଅନ୍ତି କି ଧନୀ। ସତର୍କ ରହିବା ଜରୁରୀ। ମୁଁ ନିଶ୍ଚତ ଯେ ଆହୁରି ୨ ମାସ ପରେ ହିଁ ରାଜ୍ୟରୁ କରୋନା ସଂପୂର୍ଣ୍ଣ ଭାବେ ଉଭେଇ ଯିବ। ସରକାରଙ୍କ ଅବହେଳା ଓ ମନ୍ତ୍ରୀମାନଙ୍କ ଦାୟିତ୍ୱହୀନତା ପାଇଁ ଏସବୁ ହେଉଛି ବୋଲି ଅଭିଯୋଗ ଆସୁଛନ୍ତି। ହେଲେ ମୁଁ ଏଠି କହିବାକୁ ଚାହେଁ ଯେ ଏଥିରେ କୌଣସି ସତ୍ୟତା ନାହିଁ। ସମସ୍ତଙ୍କୁ ମନେ ରଖିବା ଦରକାର ଯେ କେବଳ ଭଗବାନ ହିଁ ଆମକୁ ଏହି ମହାମାରୀ ଭାଇରସରୁ ରକ୍ଷା କରିପାରିବେ।”
ସ୍ୱାସ୍ଥ୍ୟମନ୍ତ୍ରୀଙ୍କ ଏଭଳି ବୟାନ ଯୋଗୁ ବିଜେପି ସରକାରଙ୍କୁ ବିରୋଧୀ ଦଳଗୁଡ଼ିକ ଟାର୍ଗେଟ କରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।