ନୂଆଦିଲ୍ଲୀ: ଦେଶର ୫୦ କୋଟି ମୋବାଇଲ୍ ଫୋନ୍ ନମ୍ବର ବନ୍ଦ ହୋଇଯିବାର ଆଶଙ୍କା ସୃଷ୍ଟି ହୋଇଛି। ଆଧାର ନମ୍ବର ସହିତ ଜଡ଼ିତ କେୱାଇସି (ନୋ ୟୋର କଷ୍ଟମର୍) ଯୋଗୁ ଏଭଳି ଏକ ସ୍ଥିତି ଉତ୍ପନ୍ନ ହେବାକୁ ଯାଉଛି ବୋଲି କୁହାଯାଉଛି।
ଦେଶର ୫୦ କୋଟି ମୋବାଇଲ୍ ଫୋନ୍ ବ୍ୟବହାରକାରୀ ଟେଲିକମ୍ କଂପାନୀଗୁଡ଼ିକୁ ‘ଆଧାର’ ବ୍ୟତୀତ ଅନ୍ୟ କୌଣସି ଡକ୍ୟୁମେଣ୍ଟ୍ ଦେଇ ନାହାନ୍ତି। ତେଣୁ ସେମାନଙ୍କ ନମ୍ବର ବନ୍ଦ ହୋଇଯିବା ଆଶଙ୍କା ରହିଛି।
କିଛି ଦିନ ତଳେ ସୁପ୍ରିମ୍କୋର୍ଟ ‘ଆଧାର’ ମାମଲାରେ ରାୟ ଦେଇ କହିଥିଲେ ଯେ ଟେଲିକମ୍ କଂପାନୀଗୁଡ଼ିକ ମୋବାଇଲ୍ ଫୋନ୍ ବ୍ୟବହାରକାରୀଙ୍କ ଆଧାର ନମ୍ବରକୁ ବ୍ୟବହାର କରିପାରିବେ ନାହିଁ।
ତେବେ ୫୦ କୋଟି ମୋବାଇଲ୍ ନମ୍ବର ‘ଆଧାର’ରେ ହିଁ ଚାଲିଛି। କୋର୍ଟଙ୍କ ରାୟ ଅନୁଯାୟୀ, ଟେଲିକମ୍ କଂପାନୀଗୁଡ଼ିକୁ ହିତାଧିକାରୀଙ୍କ ଆଧାର କାର୍ଡ ସଂପର୍କିତ ତଥ୍ୟକୁ ହଟାଇବାକୁ ପଡ଼ିବ। ଅନ୍ୟପକ୍ଷରେ ଏମାନେ ନିଜର ପରିଚୟ ସଂପର୍କରେ ଅନ୍ୟ କୌଣସି ଡକ୍ୟୁମେଣ୍ଟ୍ ଦେଇ ନଥିବା ଯୋଗୁ ଆଧାର ତଥ୍ୟ ହଟିବା ପରେ ମୋବାଇଲ୍ ନମ୍ବର ବି ବନ୍ଦ ହୋଇଯିବ।
ସରକାରୀ ସ୍ତରରେ ଏବେ ଏହାକୁ ନେଇ ଗମ୍ଭୀରତାର ସହିତ ବିଚାର କରାଯାଉଛି। ସମାଧାନର ରାସ୍ତା ଖୋଜିବା ପାଇଁ ବିଚାରବିମର୍ଶ ଚାଲିଛି। ଏନେଇ ଗତକାଲି ଟେଲିକମ୍ ସଚିବ ଅରୁଣା ସୁନ୍ଦରରାଜନ ବିଭିନ୍ନ ଟେଲିକମ୍ କଂପାନୀର ଅଧିକାରୀମାନଙ୍କ ସହିତ ଆଲୋଚନା କରିଥିଲେ।
ସୂଚନାଯୋଗ୍ୟ, ରିଲାଏନ୍ସ ଜିଓ ‘ଆଧାର’ ଦ୍ୱାରା ହିଁ ସବୁଠୁ ଅଧିକ ନମ୍ବର ଗ୍ରାହକଙ୍କୁ ଦେଇଛି। କାରଣ ‘ଆଧାର’ରେ ଗ୍ରାହକଙ୍କ ପୂରା ତଥ୍ୟ ଥାଏ ଓ ବାୟୋମେଟ୍ରିକ୍ ଦ୍ୱାରା ସେମାନଙ୍କ ଚିହ୍ନଟ ହୋଇପାରେ। ଗତମାସ ସୁଦ୍ଧା ଜିଓର ଗ୍ରାହକ ସଂଖ୍ୟା ୨୫ କୋଟିରେ ପହଞ୍ଚିଥିଲା। ଏଣୁ ଜିଓ ପାଇଁ ଏହା ଏକ ବଡ଼ ଚ୍ୟାଲେଞ୍ଜ ହେବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
