[caption id="attachment_163451" align="alignleft" width="194"]
ସତ୍ୟ ପଟ୍ଟନାୟକ[/caption]
ରାଗ ମଡେଲସ୍ ଆଣ୍ଡ୍ ଟ୍ୟାଲେଣ୍ଟ୍ ଏଜେନ୍ସି ପକ୍ଷରୁ କାନାଡାର ଟରୋଣ୍ଟୋ ସହରରେ ନିକଟରେ ଆୟୋଜିତ “ମିସ୍ ସାଉଥ୍ ଏସିଆ କାନାଡା ୨୦୧୭’’ ପ୍ରତିଯୋଗିତାରେ ଓଡିଆ ଝିଅ ନିକିତା ଗନ୍ତାୟତ ବିଜୟୀ ହୋଇଛନ୍ତି। ସୌନ୍ଦର୍ଯ୍ୟ ଓ ବୁଦ୍ଧିମତ୍ତାର ଶ୍ରେଷ୍ଠ ପ୍ରଦର୍ଶନ କରି ନିକିତା ଏହା ସହିତ “ମିସ୍ ବଲିଉଡ୍ ଡିଭା’’ ଟାଇଟଲ ମଧ୍ୟ ହାସଲ କରିଛନ୍ତି । ଅକ୍ଟୋବର ୨୧, ୧୯୯୪ରେ ଭାରତରେ ଜନ୍ମ ହୋଇଥିବା ନିଜର ସେ ପରିବାର ସହ ୨୦୦୨ରେ ଟରୋଣ୍ଟୋ ଚାଲିଆସିଲେ । ସେ ଏବର୍ଷ ୟୁନିଭର୍ସିଟି ଅଫ୍ ୱାଟରଲୁରୁ ମ୍ୟାନେଜମେଣ୍ଟ୍ ଇଞ୍ଜିନିୟରିଂ ଡିଗ୍ରୀ ହାସଲ କରିଛନ୍ତି । ତାଙ୍କର ବଡଭଉଣୀ ଅର୍ପିତା ଜଣେ ଡାକ୍ତର । ତାଙ୍କର ବାପା ଶୁଭେନ୍ଦୁ ଗନ୍ତାୟତ ଓଡିଶାରେ ପାରଳାଖେମୁଣ୍ଡି ଅଞ୍ଚଳର ଓ ମା ନନ୍ଦିତା ଯାଜପୁର ଅଞ୍ଚଳର । ଏହି ପ୍ରତିଯୋଗିତା ସମ୍ପର୍କରେ ନିକିତାଙ୍କ ନିଜସ୍ୱ ଅଭିଜ୍ଞତା, ଭବିଷ୍ୟତ ଯୋଜନା ତଥା ଜଣେ ଦ୍ୱିତୀୟ ପିଢି ଇମିଗ୍ରାଣ୍ଟ ଓଡିଆ ଭାବରେ ଓଡିଶା ପ୍ରତି ତାଙ୍କର ବିଚାର ସମ୍ପର୍କରେ ତାଙ୍କ ସହିତ ଆଲୋଚନା କରିଛନ୍ତି ଲେଖକ ସତ୍ୟ ପଟ୍ଟନାୟକ
ପ୍ରଶ୍ନ: ମିସ୍ ଦକ୍ଷିଣ ଏସିଆ କାନାଡା ୨୦୧୭ ପ୍ରତିଯୋଗିତାରେ ବିଜୟୀ ହୋଇଥିବାରୁ ଅସଂଖ୍ୟ ଓଡିଶାବାସୀଙ୍କ ତରଫରୁ ଆପଣଙ୍କୁ ହାର୍ଦିକ ଅଭିନନ୍ଦନ । ଫଳାଫଳ ଘୋଷଣା ହେବା ମାତ୍ରକେ ଆପଣଙ୍କର ଆସନ୍ନ ପ୍ରତିକ୍ରିୟା କଣ ଥିଲା?
ଉତ୍ତର: ଆପଣଙ୍କର ଶୁଭେଚ୍ଛା ଓ ପ୍ରୋତ୍ସାହନ ପାଇଁ ଧନ୍ୟବାଦ - ଏହା ମୋ ପାଇଁ ଅନେକ ମହତ୍ତ୍ୱପୂର୍ଣ୍ଣ। ଯେତେବେଳେ ଫଳାଫଳ ଘୋଷଣା କରାଗଲା, ସେଇ ମୁହୂର୍ତ୍ତ ମୋ ପାଇଁ ଖୁବ୍ ସ୍ୱପ୍ନିଳ ଏବଂ ଆବେଗାତ୍ମକ ଥିଲା । ମୋ ଭିତରେ ଆବେଗର ରୋଲରକୋଷ୍ଟର ଦୌଡିଲା ଭଳି ଲାଗୁଥିଲା। ଏଭଳି ଏକ ଗୌରବପୂର୍ଣ୍ଣ ଟାଇଟେଲ୍ ଜିତି ନିଜକୁ ମୁଁ ଭାଗ୍ୟଶାଳୀ ଅନୁଭବ କଲି, ମୂଳରୁ ଯାହା ଚାହୁଁଥିଲି ତାକୁ ପାଇବାର ଖୁସିରେ ଉଲ୍ଲସିତ ଥିଲି । ମୋତେ ପ୍ରତ୍ୟେକ ମୁହୂର୍ତ୍ତରେ ଅନୁପ୍ରାଣିତ କରିଥିବା ପାଇଁ ମୁଁ ମୋର ପରିବାର ପ୍ରତି କୃତଜ୍ଞ ।
ପ୍ରଶ୍ନ: ଏହି ପ୍ରତିଯୋଗିତା ଆପଣଙ୍କ ପାଇଁ କେତେ ଅର୍ଥପୂର୍ଣ୍ଣ ଥିଲା ଓ ଏଥି ପାଇଁ କିପରି ଭାବରେ ପ୍ରସ୍ତୁତି କରୁଥିଲେ?
ଉତ୍ତର: ମୁଁ ପିଲାଟି ଦିନରୁ ଏକ ସୁନ୍ଦରୀ ପ୍ରତିଯୋଗିତା ଜିତିବାର ସ୍ୱପ୍ନ ଦେଖିଥିଲି । ମୁଁ ଯେତେବେଳେ ବଡ ହେଲି ଏବଂ ଏ ବିଷୟରେ ଅଧିକା ଜାଣିଲି, ଏହା ମାଧ୍ୟମରେ ମୁଁ ମହତ୍ତ୍ୱପୂର୍ଣ୍ଣ ସାମାଜିକ ବିଷୟକୁ ନେଇ ବିଶ୍ୱ ସ୍ତରରେ ଲୋକମାନଙ୍କ ନିକଟରେ ମୋ ସ୍ୱରକୁ ପହଁଚେଇବାର ସମ୍ଭାବନା ମୋତେ ଅନୁପ୍ରାଣିତ କଲା । ଏ ପ୍ରତିଯୋଗିତା ପାଇଁ ମୋର ପ୍ରସ୍ତୁତି ଆଜୀବନ । ମୋର ଲାଳନ ପାଳନ, ଶିକ୍ଷା, ନୃତ୍ୟ ସଂଗୀତ ଅଭିନୟ ଗାୟନ ତଥା ମଡେଲିଙ୍ଗ କରିବାର ଉତ୍କଣ୍ଠା ଏବଂ ମୋର ସମଗ୍ର ବ୍ୟକ୍ତିତ୍ୱ ମୋତେ ଏହି ପ୍ରତିଯୋଗିତାରେ ସଫଳତା ହାସଲ କରିବା ପାଇଁ ପ୍ରସ୍ତୁତ କରାଇଛି ।
ପ୍ରଶ୍ନ: ବିଚାରକମଣ୍ଡଳୀ ଦ୍ୱାରା ଆପଣ ନିଜକୁ କେମିତି ଜୋଡି ପାରିଲେ? ପ୍ରତିଯୋଗିତାର କୌଣସି ସମୟରେ ଆପଣଙ୍କୁ ଲାଗିଛି ଏ ପ୍ରତିଯୋଗିତା ଆପଣ ଜିତିବେ ବୋଲି?
ଉତ୍ତର: ମୋର ଅନ୍ତଃପ୍ରକାଶ, ଅକୃତିମତା, ବିନୟ ଏବଂ ଆତ୍ମବିଶ୍ୱାସ ମୋତେ ଏହି ପ୍ରତିଯୋଗିତାରେ ବିଜୟୀ ହେବାକୁ ଦେଇଛି ବୋଲି ମୋର ଆଶା । ପ୍ରତିଯୋଗିତା ପୂର୍ବରୁ ଗୋଟିଏ ସାତଦିନିଆ କାର୍ଯ୍ୟଶାଳାରେ ପ୍ରତ୍ୟେକ ସହଭାଗୀକୁ ତାର ନୃତ୍ୟ, କାଟ୍ୱାକ୍, ବ୍ୟକ୍ତିତ୍ୱ ଇତ୍ୟାଦି ବିଷୟରେ ନିର୍ଣ୍ଣୟ କରାଯାଉଥିଲା ଯେଉଁଠୁ ମୋର ସହଭାଗୀ ମାନଙ୍କ ନିକଟରୁ ମୋ ବିଷୟରେ ସକାରାତ୍ମକ ପ୍ରତିକ୍ରିୟା ମିଳୁଥିଲା । ଏହା ବ୍ୟତୀତ, ପ୍ରଶ୍ନୋତ୍ତର ସମୟରେ ମୋର ଉତ୍ତରରେ ଦର୍ଶକମାନଙ୍କ ଉଚ୍ଚ କୋଳାହଳ ଓ କରତାଳିରୁ ମୋର ଜିତିବାର ବିଶ୍ୱାସ ଦୃଢୀଭୂତ ହେଲାପରି ଲାଗୁଥିଲା ।
ପ୍ରଶ୍ନ: ଆପଣ ବିଭିନ୍ନ ଯାଗାରେ ଅନେକ ସାଂସ୍କୃତିକ କାର୍ଯ୍ୟକ୍ରମରେ ଭାଗ ନିଅନ୍ତି । ଆପଣଙ୍କ ଭିତରେ କେମିତି ଓ କେବେ ଏ ଇଛା ଜାଗୃତ ହେଲା?
ଉତ୍ତର: ପିଲା ଦିନରୁ ହିଁ ପ୍ରଦର୍ଶନ କଳା ପ୍ରତି ମୋର ଗଭୀର ଆଗ୍ରହ । ମୋ ମାଆଙ୍କ ପ୍ରୋତ୍ସାହନ ତଥା ସମର୍ଥନରେ ମୁଁ ଅନେକ ସାଂସ୍କୃତିକ କାର୍ଯ୍ୟକ୍ରମରେ ଭାଗ ନେଇଛି ଏବଂ ପୁରସ୍କାର ଓ ଲୋକପ୍ରିୟତା ହାସଲ କରିଛି । ନିକଟ ଅତୀତରେ କାନାଡା ଓଡିଆ ସୋସାଇଟି, ଆମେରିକା ଓଡିଆ ସୋସାଇଟି ଏବଂ ପାନୋରାମା ଇଣ୍ଡିଆର ଅନେକ ପ୍ରୋଗ୍ରାମରେ ପ୍ରଦର୍ଶନ କରିଛି ।
ପ୍ରଶ୍ନ: ଆପଣ ଜଣେ ଇଞ୍ଜିନିୟରିଂ ଛାତ୍ରୀ । ତା ସାଙ୍ଗକୁ ଏ ସବୁ ସାଂସ୍କୃତିକ କାର୍ଯ୍ୟକ୍ରମର ଚାପ । ସମୟକୁ କେମିତି ଠିକ ଭାବେ ବିନିଯୋଗ କରନ୍ତି?
ଉତ୍ତର: ପାଠ୍ୟକ୍ରମ ତଥା ପାଠ୍ୟୋତ୍ତର (ଏକ୍ସଟ୍ରାକରିକୁଲାର)କୁ ସୂଚାରୁ ରୂପେ ସମୟ ଦେବାର ଶୈଳୀକୁ ମୁଁ ସମୟ କ୍ରମେ ଶିଖି ପାରିଛି । ପ୍ରାଥମିକତାର ଉପଯୋଗ, ସୁଅବସରର ବ୍ୟବହାର ତଥା ପ୍ରତିବଦ୍ଧତାର ସନ୍ତୁଳନ ମୋତେ ମୋର କାମକୁ ଠିକ ଭାବରେ ସମ୍ପାଦନ କରିବାକୁ ଦେଇଛି।
ପ୍ରଶ୍ନ: ଆପଣଙ୍କର ଏହାକୁ ନେଇ ଆଉ କିଛି ଭବିଷ୍ୟତ ଯୋଜନା ଅଛି? ଆଉ କୌଣସି ସୁନ୍ଦରୀ ପ୍ରତିଯୋଗିତାରେ ଯୋଗ ଦେବାପାଇଁ ଭାବୁଛନ୍ତି?
ଉତ୍ତର: ସମ୍ପ୍ରତି ମୁଁ ମଡେଲିଙ୍ଗ୍ ଓ ଅଭିନୟ ଶିଖୁଛି ଏବଂ କିଛି ସଙ୍ଗୀତ ଭିଡିଓରେ ଅଭିନୟ ମଧ୍ୟ କରିଛି । ମୁଁ ଏହି ସବୁକୁ ଜାରୀ ରଖିବି ଓ ଭବିଷ୍ୟତରେ ପ୍ରତିଯୋଗିତା ମାନଙ୍କରେ ମଧ୍ୟ ଭାଗ ନେବି।
ପ୍ରଶ୍ନ: ଜଣେ ଦ୍ୱିତୀୟ ପିଢି ଓଡିଆ ଭାବରେ କାନାଡିଆନ୍ ଜୀବନ ଯାପନ ପାଇଁ କିଛି ଅସୁବିଧା ହୋଇଛି? ଗୋଟିଏ ସମୟରେ ଦୁଇଟି ସଂସ୍କୃତିସହ ଜୋଡି ରହିବାର ଚାପ ଅନୁଭବ କରିଛନ୍ତି?
ଉତ୍ତର: ଯଦିଓ ମୋର ପିତା ମାତା ଓଡିଶାରେ ଜନ୍ମ ଓ ବଡ ହୋଇଛନ୍ତି, କିନ୍ତୁ ତାଙ୍କ ଜୀବନର ମୂଖ୍ୟ ସମୟ ପୃଥିବୀର ବିଭିନ୍ନ ପ୍ରାନ୍ତରେ କଟିଛି । ସେଥିପାଇଁ ସେମାନେ ମୋ ମନ ଭିତରେ ଉଭୟ ଓଡିଆ ତଥା ପାଶ୍ଚାତ୍ୟ ସଂସ୍କୃତିର ମୂଲ୍ୟବୋଧକୁ ଉଚିତ ଭାବରେ ଦର୍ଶେଇ ପାରିଛନ୍ତି । ଏହା ମୋତେ କାନାଡାର ବହୁ ସଂସ୍କୃତି ପରିବେଶରେ ସଂପୂର୍ଣ୍ଣଭାବେ ସଙ୍ଘଟିତ ହେବାପାଇଁ ସାହାଯ୍ୟ କରିଛି ।
ପ୍ରଶ୍ନ: ଆପଣ କେବେ ଓଡିଶାର ସାମ୍ପ୍ରତିକ ସାମାଜିକ ଚିତ୍ର ସହ ନିଜକୁ ଜୋଡିବାକୁ ଚେଷ୍ଟା କରିଛନ୍ତି?
ଉତ୍ତର: ହଁ । ମୁଁ ଓଡିଶା ନିୟମିତ ଭାବେ ଯାଏ ଏବଂ ମୋ ରାଜ୍ୟର ସାମାଜିକ ଚିତ୍ରକୁ ଠିକ ଭାବରେ ବୁଝିବାକୁ ଚେଷ୍ଟା କରେ ।
ପ୍ରଶ୍ନ: ଆପଣ କଣ ଭାବୁଛନ୍ତି ବର୍ତ୍ତମାନର ନାରୀ ପୂର୍ବ ସମୟର ନାରୀ (ଆପଣଙ୍କର ଜେଜେମା, ଗୋସେଁଇ ମା)ଙ୍କ ଠାରୁ ଭିନ୍ନ? ନାରୀ ସଶକ୍ତୀକରଣ କେମିତି ସମ୍ଭବ ହେବ ବୋଲି ଆପଣ ଭାବନ୍ତି?
ଉତ୍ତର: ପୂର୍ବ ସମୟର ନାରୀଙ୍କ ତୁଳନାରେ ବର୍ତ୍ତମାନର ନାରୀ ନିଶ୍ଚିତ ଭାବେ ସମାଜରେ ଉଚ୍ଚ ସ୍ଥାନକୁ ଆସିପାରିଛି ବୋଲି ମୋର ବିଶ୍ୱାସ । ବର୍ତ୍ତମାନର ନାରୀମାନେ ଯେଉଁ ସମାଜରେ ବଞ୍ଚିଛନ୍ତି ସେଠି ଅଧିକ ସମାନ-ଅଧିକାର ଏବଂ ଶିକ୍ଷା, ବୃତ୍ତି ଓ ମତ ରଖିବାର ଅଧିକାର ପୂର୍ବାପେକ୍ଷା ଉନ୍ନତ। ନାରୀ ଶିକ୍ଷାର ପ୍ରୋତ୍ସାହନ, ନାରୀ ଅଧିକାର ଓ ତାଙ୍କ ପାଇଁ ବିଭିନ୍ନ ସୁଯୋଗ ବିଷୟରେ ଜ୍ଞାନ ଦେବା ଦ୍ୱାରା ନାରୀ ସଶକ୍ତୀକରଣ ସମ୍ଭବ ହୋଇପାରିବ ।
ପ୍ରଶ୍ନ: ଏଇ ପୁରୁଷ ପ୍ରମୂଖ ସମାଜରେ କେମିତି ସମ୍ମାନର ସହିତ ଜୀବନ ଯାପନ କରିବାକୁ ହେବ, ଏ ବିଷୟରେ ଓଡିଶାର ନାରୀମାନଙ୍କୁ ଶିକ୍ଷା ଦେବାପାଇଁ ପ୍ରତିବର୍ଷ ଓଡିଶାରେ କିଛି ସମୟ ବିତେଇବାର କିଛି ଯୋଜନା କରିଛନ୍ତି?
ଉତ୍ତର: ହଁ, ଏ ବିଷୟରେ ମୋର ପ୍ରଚୁର ଆଗ୍ରହ ରହିଛି । ଓଡିଶାରେ ଏପରି କାର୍ଯ୍ୟ କରୁଥିବା ଏନ୍.ଜି.ଓ ମାନଙ୍କ ସହଯୋଗରେ ମୁଁ ଅଧିକରୁ ଅଧିକ ମହିଳାଙ୍କ ସହିତ ଯୋଗାଯୋଗ କରି ଏକ ଭଲ ସମାଜ ତିଆରି କରିବାରେ ସାହାଯ୍ୟ କରିବାକୁ ଚାହେଁ । ତା ବ୍ୟତୀତ, ଯେତେବେଳେ ମୋର କାର୍ଯ୍ୟ ପ୍ରତିବଦ୍ଧତା ମୋତେ ଅନୁମତି ଦେବ, ମୁଁ ଓଡିଶା ଆସି ଏହି ମହିଳାମାନଙ୍କୁ ଭେଟିବି।
ପ୍ରଶ୍ନ: ଭବିଷ୍ୟତରେ ଏଭଳି ପ୍ରତିଯୋଗିତାରେ ଭାଗ ନେବାକୁ ଇଛା କରୁଥିବା ତରୁଣୀ ମାନଙ୍କୁ କଣ କହିବେ?
ଉତ୍ତର: ଯେତେବି କଠିନ ହେଉନା କାହିଁକି, ମୁଁ ସେଇ ତରୁଣୀ ମାନଙ୍କୁ ସେମାନଙ୍କର ସ୍ୱପ୍ନକୁ ଅନୁସରଣ କରିବାପାଇଁ କହିବି । ସୁନ୍ଦରୀ ପ୍ରତିଯୋଗିତା ଗୋଟିଏ ଗୋଟିଏ ମଞ୍ଚ ଯେଉଁଠି ଜଣେ ନିଜକୁ ବ୍ୟକ୍ତ କରିବା ନିମନ୍ତେ ସୁଯୋଗ ପାଏ, କିଛି କରିବାପାଇଁ ନିପୁଣତା ହାସଲ କରେ । କୁହାଯାଏ ଯେ ହଜାର ମାଇଲର ଯାତ୍ରା ଗୋଟିଏ ପାଦରୁ ଆରମ୍ଭ ହୁଏ ।
ପ୍ରଶ୍ନ: ଓଡିଶାବାସୀଙ୍କ ପାଇଁ କିଛି ବାର୍ତ୍ତା?
ଉତ୍ତର: ମୁଁ ଓଡିଶାରୁ ଆସିଛି ତଥା ଆମର ଓଡିଆ ପରମ୍ପରାକୁ ନେଇ ମୁଁ ପ୍ରତି ମୁହୂର୍ତ୍ତରେ ଗର୍ବ ଅନୁଭବ କରେ । ମୁଁ ଓଡିଶା ଓ ଏହାର ଅପୂର୍ବ ତଥା ଅସାଧାରଣ ସଙ୍ଗୀତ, ନୃତ୍ୟ, କଳା ଏବଂ ଖାଦ୍ୟର ପ୍ରସାର କରିବାପାଇଁ ବ୍ରାଣ୍ଡ୍ ଆମ୍ବାସଡର ଭାବେ କାର୍ଯ୍ୟ କରିବାକୁ ଚାହେଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
