ଏମିତି ଏକ ବ୍ଲାକ୍ ହୋଲ୍, ଗିଳିଦେଲା ସମ୍ପୂର୍ଣ୍ଣ ଏକ ସୂର୍ଯ୍ୟ

ବ୍ଲାକ୍ ହୋଲକୁ ବିନା କାରଣରେ ସୃଷ୍ଟିର ଅନ୍ୟତମ ରହସ୍ୟମୟ ବସ୍ତୁ ଭାବରେ ବିବେଚନା କରାଯାଏ ନାହିଁ। ପ୍ରତ୍ୟେକ ନୂତନ ଆବିଷ୍କାର ବ୍ଲାକ୍ ହୋଲର ରହସ୍ୟକୁ ବଢ଼ାଇଥାଏ। ବୈଜ୍ଞାନିକମାନେ ଏପର୍ଯ୍ୟନ୍ତ ପାଇଥିବା ଅଧିକାଂଶ ବ୍ଲାକ୍ ହୋଲଗୁଡିକ ବାଇନାରୀ ସିଷ୍ଟମରେ ମିଳିଛି। ଏଥିରେ ଗୋଟିଏ ବ୍ଲାକ୍ ହୋଲ୍ ଥାଏ ଏବଂ ଏହି ସିଷ୍ଟମରେ ଥିବା ଅନ୍ୟ ପିଣ୍ଡଟି ଏକ ତାରା କିମ୍ବା ଅଧିକ ଘନ ନିଉଟ୍ରନ୍ ତାରକା କିମ୍ବା ଅନ୍ୟ ଏକ ବ୍ଲାକ୍ ହୋଲ୍ ହୋଇଥାଏ। ଏହି ବାଇନାରୀ ସିଷ୍ଟମଗୁଡ଼ିକ ପରସ୍ପର ଚାରିପଟେ ଘୂରି ବୁଲନ୍ତି ଏବଂ ବ୍ଲାକ ହୋଲର ମାଧ୍ୟାକର୍ଷଣ ଦ୍ୱାରା ଏକତ୍ର ଟାଣିହୋଇ ରହିଥାନ୍ତି। 

ହେଲେ ବୈଜ୍ଞାନିକମାନେ ପ୍ରଥମ ଥର ପାଇଁ ଏକ 'ବ୍ଲାକ୍ ହୋଲ୍ ଟ୍ରିପଲ୍ ସିଷ୍ଟମ୍' ଆବିଷ୍କାର କରିଛନ୍ତି। ଏଥିରେ ବ୍ଲାକ୍ ହୋଲ୍ ତ ଅଛି, ଏହା ସହିତ କେବଳ ଗୋଟିଏ ନୁହେଁ, ଦୁଇ ଦୁଇଟି ପିଣ୍ଡ ଅଛି। ଏହି ନୂଆ 'ବ୍ଲାକ୍ ହୋଲ୍ ଟ୍ରିପଲ୍ ସିଷ୍ଟମ୍' ପୃଥିବୀଠାରୁ ପ୍ରାୟ ୮୦୦୦ ଆଲୋକ ବର୍ଷ ଦୂରରେ ରହିଛି।

ନୂତନ ଆବିଷ୍କୃତ ହୋଇଥିବା 'ବ୍ଲାକ୍ ହୋଲ୍ ଟ୍ରିପଲ୍ ସିଷ୍ଟମ'ରେ ଏକ କେନ୍ଦ୍ରୀୟ ବ୍ଲାକ୍ ହୋଲ୍ ଅଛି। ଏହି ବ୍ଲାକ୍ ହୋଲ୍ ଏତେ ବଡ଼ ଯେ, ଏହା ଏକ ସୂର୍ଯ୍ୟକୁ ଗିଳି ଦେଉଛି। ଆଶ୍ଚର୍ଯ୍ୟଜନକ କଥା ହେଉଛି ବ୍ଲାକ୍ ହୋଲ୍ ନିକଟରେ ଆଉ ଏକ ତାରା ଦୃଶ୍ୟମାନ ହେଉଛି, କିନ୍ତୁ ଏହା ପ୍ରଥମ ନକ୍ଷତ୍ରଠାରୁ ବହୁତ ଦୂରରେ। ଅକ୍ଟୋବର ୨୩ରେ 'ନେଚର' ପତ୍ରିକାରେ ପ୍ରକାଶିତ ଏକ ଅଧ୍ୟୟନରେ ବୈଜ୍ଞାନିକମାନେ ଏହି ଆବିଷ୍କାର ବିଷୟରେ ଜଣାଇଛନ୍ତି।

ଏହି ବ୍ଲାକ୍ ହୋଲର ନିକଟତମ ନକ୍ଷତ୍ର ମାତ୍ର ୬.୫ ଦିନରେ ଏହାର ପରିକ୍ରିମା କରିଦେଉଛି। ବୈଜ୍ଞାନିକମାନେ ଆକଳନ କରିଛନ୍ତି ଯେ ଦ୍ୱିତୀୟ ନକ୍ଷତ୍ର ପ୍ରତି ୭୦ ହଜାର ବର୍ଷରେ ବ୍ଲାକ୍ ହୋଲ୍ ଚାରିପାଖରେ ଗୋଟିଏ ଥର ପରିକ୍ରମା କରୁଛି। ବ୍ଲାକ୍ ହୋଲଠାରୁ ବହୁ ଦୂରରେ ଥିବା ସତ୍ତ୍ୱେ ଏହି ଦ୍ୱିତୀୟ ନକ୍ଷତ୍ର ବ୍ଲାକ୍ ହୋଲର ମାଧ୍ୟାକର୍ଷଣର ପ୍ରଭାବରେ ଅଛି, ଯାହାକୁ ନେଇ ଏହି ବ୍ଲାକ୍ ହୋଲର ଉତ୍ପତ୍ତି ବିଷୟରେ ପ୍ରଶ୍ନ ଉଠୁଛି।

ବୈଜ୍ଞାନିକମାନେ ଅନୁମାନ କରୁଛନ୍ତି ଯେ, ସୁପରନୋଭା (ଏକ ଧ୍ୱଂସ ପାଉଥିବା ତାରାରେ ହେଉଥିବା ବିସ୍ଫୋରଣ)ରୁ ବ୍ଲାକ୍ ହୋଲ୍ ସୃଷ୍ଟି ହୁଏ। ସୁପରନୋଭା ସମୟରେ, ଏକ ତାରା ଶେଷ ଥର ପାଇଁ ବିପୁଳ ପରିମାଣର ଶକ୍ତି ଏବଂ ଆଲୋକ ନିର୍ଗତ କରେ ଏବଂ ତା’ପରେ ଏକ ଅଦୃଶ୍ୟ ବ୍ଲାକ୍ ହୋଲରେ ଖସିଯାଏ। ଯଦି ଏହି ନୂତନ ଭାବରେ ଦେଖାଯାଇଥିବା ବ୍ଲାକ୍ ହୋଲ୍ ଏକ ସାଧାରଣ ସୁପରନୋଭାରୁ ସୃଷ୍ଟି ହୋଇଥାନ୍ତା, ତେବେ ତାରାଟି ଖସିଯିବା ପୂର୍ବରୁ ପ୍ରଚୁର ଶକ୍ତି ଛାଡ଼ିଥିବ, ଏହି ଶକ୍ତି ଏହାର ବାହ୍ୟ ଅଞ୍ଚଳର କକ୍ଷପଥରେ ଥିବା ଅନ୍ୟ କୌଣସି ହାଲୁକା ବସ୍ତୁକୁ ଦୂରକୁ ଠେଲିଦେବ। ଏହି ନିୟମ ଅନୁସାରେ, ସେହି ଦ୍ୱିତୀୟ ବାହ୍ୟ ନକ୍ଷତ୍ର ଏପର୍ଯ୍ୟନ୍ତ ସେଠାରେ ଅଟକି ରହିବା ଉଚିତ୍ ନୁହେଁ।

ଗବେଷଣାକାରୀ ଦଳର ବିଶ୍ୱାସ ଯେ, ଏହି ବ୍ଲାକ୍ ହୋଲ୍ କୌଣସି 'ଡାଇରେକ୍ଟ କୋଲାପ୍ସ' ନାମକ ଏକ ପ୍ରକ୍ରିୟା ମାଧ୍ୟମରେ ସୃଷ୍ଟି ହୋଇଛି। ଏହି ସମୟ ମଧ୍ୟରେ, ଗୋଟିଏ ନକ୍ଷତ୍ର ନିଜେ ନିଜେ ଧ୍ୱଂସ ପାଇଯାଏ ଏବଂ କୌଣସି ଶେଷ ବିସ୍ଫୋରଣ ବିନା ଏକ ବ୍ଲାକ୍ ହୋଲ୍ ସୃଷ୍ଟି ହୋଇଯାଏ। ଏହିପରି ଏକ ବ୍ଲାକ୍ ହୋଲର ଗଠନ କୌଣସି ଦୁର୍ବଳ ବାହ୍ୟ ବସ୍ତୁକୁ ବିଚଳିତ କରିବ ନାହିଁ। ବୈଜ୍ଞାନିକମାନେ ଭାବନ୍ତି ଏହି ନୂତନ 'ଟ୍ରିପଲ୍ ସିଷ୍ଟମ୍' ହୁଏତ ଏହି ପ୍ରକ୍ରିୟା ମାଧ୍ୟମରେ ବ୍ଲାକ୍ ହୋଲ୍ ସୃଷ୍ଟି ହେବାର ପ୍ରଥମ ପ୍ରମାଣ ହୋଇପାରେ।