ପାନ୍‌ ଓ ଆଧାର ତଥ୍ୟ ନଦେଲେ ଗଣିବେ ଦରମାର ୨୦% ଟିଡିଏସ୍‌

ନୂଆଦିଲ୍ଲୀ: ଆପଣଙ୍କର ଆୟ ଯଦି ଅଢ଼େଇ ଲକ୍ଷ (୨.୫)ରୁ ଊର୍ଦ୍ଧ୍ୱ ଏବଂ ଆପଣଙ୍କ ଆଧାର ଓ ପାନ୍‌ ତଥ୍ୟ ଦେଇନାହାନ୍ତି, ଆପଣ ଅଡ଼ୁଆରେ ପଡ଼ିପାରନ୍ତି। ଆପଣଙ୍କ ନିଯୁକ୍ତିଦାତା ଆପଣଙ୍କ ଦରମାରୁ ୨୦% ଟିଡିଏସ୍‌ ଆକାରରେ କାଟିନେବେ। ଆୟକର ବିଭାଗ ପକ୍ଷରୁ ଏପରି ନିର୍ଦ୍ଦେଶ ଦିଆଯାଇଛି।

ସେଣ୍ଟ୍ରାଲ ବୋର୍ଡ ଅଫ୍‌ ଡାଇରେକ୍ଟ ଟ୍ୟାକ୍ସେସ୍‌ (ସିବିଡିଟି) ଏହି ନିୟମ ପ୍ରଣୟନ କରିଥିଲା। ଏହା ଗତ ୧୬ ତାରିଖରୁ ଲାଗୁ କରାଯାଇଛି। ଏହା ଅଢ଼େଇ ଲକ୍ଷ ଟଙ୍କାରୁ ଊର୍ଦ୍ଧ୍ୱ ଆୟ କରୁଥିବା ଲୋକଙ୍କ ପାଇଁ ଲାଗୁ ହେବ।

ଟିଡିଏସ୍‌ ପେମେଣ୍ଟ ଏବଂ ରାଜସ୍ୱ ଉପରେ ନଜର ରଖିବା ପାଇଁ ଏହି ନିୟମ କରାଯାଇଛି। ୨୦୧୮-୧୯ରେ ଏହି ସେଗମେଣ୍ଟରୁ ୩୭% ରେଭେନ୍ୟୁ ବା ରାଜସ୍ୱ ମିଳିଥିଲା। ୮୬ ପୃଷ୍ଠା ବିଶଷ୍ଟ ସର୍କୁଲାରରେ ସିବିଡିଟି ପକ୍ଷରୁ କୁହାଯାଇଛି, ଧାରା ୨୦୬-ଏଏ ଅନୁଯାୟୀ କର୍ମଚାରୀମାନେ ପାନ୍‌ ଓ ଆଧାର ତଥ୍ୟ ଦେବାକୁ ବାଧ୍ୟ। ଯଦି ଏପରି କରିବାରେ କର୍ମଚାରୀ ବିଫଳ ହୁଅନ୍ତି ତେବେ ତାଙ୍କ ଦରମାର ଟିକସ ଦର ବା ୨୦% ବା ତାଠାରୁ ଊର୍ଦ୍ଧ୍ୱ ଟଙ୍କା କଟାଯିବ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।