ନଦୀକୁ ଖସି ପଡ଼ିଲା କାର୍‌, ୪ ଜଣଙ୍କ ମୃତ୍ୟୁ ଆଶଙ୍କା

ଶ୍ରୀନଗର: ଜମ୍ମୁ-କଶ୍ମୀରର ଡୋଡା ଜିଲ୍ଲାରେ ଭୟଙ୍କର ସଡ଼କ ଦୁର୍ଘଟଣା ଘଟିଛି। ପ୍ରେମାନଗର ଅଞ୍ଚଳ ଅତିକ୍ରମ କରୁଥିବା ବେଳେ ଗୋଟିଏ ଯାତ୍ରୀବାହୀ କାର୍ ଭାରସାମ୍ୟ ହରାଇ ସ୍ଥାନୀୟ ଚେନାବ ନଦୀକୁ ଖସି ପଡ଼ିଛି। ଏହି ଘଟଣାରେ କାରରେ ଥିବା ୪ ଜଣ ନିଖୋଜ ହୋଇଯାଇଛି। ତେଣୁ ସେମାନଙ୍କର ମୃତ୍ୟୁ ଘଟିଥିବା ଆଶଙ୍କା କରିଛନ୍ତି ଏସ୍‌ଡିଏମ ଅଥର ଅମୀନ ଜାରଗର।

ତେବେ କେଉଁ ପରିସ୍ଥିତିରେ ଘଟଣା ଘଟିଲା ଓ କାର୍‌ରେ କେତେ ଜଣ ଥିଲେ? ସେମାନଙ୍କ ଅବସ୍ଥା କେମିତି ଅଛି? କାର୍‌ଟିକୁ ନଦୀ ମଧ୍ୟରୁ ଉଦ୍ଧାର କରାଯାଇଛି କି ନାହିଁ, ସେ ବିଷୟରେ ଏସ୍‌ଡିଏମ କିଛି ବି କହି ନାହାନ୍ତି। କେବଳ ଚେନାବ ନଦୀକୁ କାର ଖସି ପଡ଼ିବାରୁ ୪ ଜଣଙ୍କ ଜୀବନ ଯାଇଥିବା ଆଶଙ୍କା କରାଯାଉଥିବା ସେ କହିଛନ୍ତି।

କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ ଦୁର୍ଘଟଣା ପୀଡ଼ିତଙ୍କୁ ଠାବ ପାଇଁ ସବୁ ପ୍ରକାରର ଚେଷ୍ଟା ଚାଲିଛି ଓ ସ୍ଥାନୀୟ ପ୍ରଶାସନ ସହ ସେ ଯୋଗାଯୋଗରେ ରହିଥିବା କହିଛନ୍ତି। ଆଜି ସକାଳ ୧୦.୭ରେ ଟ୍ୱିଟ କରି ଶ୍ରୀ ସିଂହ କହିଛନ୍ତି, “ବର୍ତ୍ତମାନୁ ମୁଁ ଡୋଡାର ଜିଲ୍ଲାପାଳ ଭିନେଶ ପଲ ମହାଜନଙ୍କ ସହ କଥା ହୋଇଛି। ୪ ଜଣଙ୍କୁ ନେଇ ଯାଉଥିବା ଗୋଟିଏ ଘରୋଇ କାର୍‌ ଭାରସାମ୍ୟ ହରାଇ ଥାଥ୍ରୀ ଓ ପ୍ରେମ ନଗର ମଧ୍ୟରେ ଥିତବା ଶିବନୋଠାରେ ଚେନାବ ନଦୀକୁ ଖସି ପଡ଼ିଛି। ପୀଡ଼ିତଙ୍କୁ ଠାବ କରିବା ପାଇଁ ସବୁ ପ୍ରକାରର ଉଦ୍ୟମ କରାଯାଉଛି। କାର ଓ ଏଥିରେ ଥିବା ଲୋକଙ୍କୁ ଠାବ କରିବାକୁ ସର୍ଚ୍ଚ ଅପରେସନକୁ ଜୋରଦାର କରାଯାଇଛି।”


ଏହାପୂର୍ବରୁ ମଙ୍ଗଳବାର ସକାଳେ କୁପୱାଡା ଜିଲ୍ଲାର ହାଣ୍ଡୱାରା ଠାରେ ଲୋକଙ୍କୁ ନେଇ ଯାଉଥିବା ଗୋଟିଏ ବସ୍‌ ଦୁର୍ଘଟଣାଗ୍ରସ୍ତ ହୋଇଥିଲା। ଏଥିରେ ୨୦ ଜଣ ଆହତ ହୋଇଥିଲେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।